Salesclerk sakay sa bisikleta gipusil angol

CEBU, Philippines - Naangol ang usa ka trabahante sa usa ka inilang supermarket  human kini pusila sa wala  hiilhing   kriminal  didto sa F. Jaca Street, Barangay Inayawan, dakbayan sa Sugbo  sa miaging  gabii.

Ang biktima   mao  si  Vincent Cabañelez, 21, usa ka salesclerk sa La Nueva Supermart  sa  Inayawan ug nagpuyo sa Sitio Galaxy, Barangay Tanke,  dakbayan  sa Talisay.

Base sa imbestigasyon nga gihimo sa kapolisan, ang biktima nagmaniho sa   iyang bisikleta   paingon  sa  Talisay.

Apan  pag-abot  niya  sa maong  lugar  nakadungog  siya  og  buto  sa armas  de fuego  ug  naigo  ang  iyang  wala  nga bukton.

Busa  mipakusog  siya og  padagan  sa iyang  bisikleta   ug  sa  pag-abot  niya  sa  barangay   San Roque  Talisay  nasugatan  niya  ang  mga  tanod  nga  nag-roving  ug  nangayo  siya  og  tabang  niini.

Gihatud  dayon  ang  biktima  ngadto  sa  Talisay District Hospital apan gibalhin kini sa Cebu City Medical Center.

Padayon  pang  gipanid-an  sa kapolisan  ang  miluthang  sa biktima. (USJR –/WC) (BANAT NEWS)