Badlungong drivers palutsa’g warrant

CEBU, Philippines - Mga badlungong drayber gipalutsan og warrant of arrest aron pugson sila sa pagbayad sa ilang mga multa sa traffic violations sa nanglabay nang katuigan.

Kini ang nasayran kang Mayor Jonas Cortes nga nahinabi sa Banat Manobela niadtong miaging adlaw kinsa miingon nga ang pagluwat og warrant of arrest sa mga malapasong drayber sa trapiko resulta kini sa pagsang-at na sa ilang mga violations ngadto sa korte.

Gitataw ni Cortes nga ang pagpasaka og kaso batok sa abusadong mga drayber usa ka paagi aron sila madisiplina  ug mag-amping na sa ilang pagmaneho sa ilang pag-agi sa kadalanan sa dakbayan.

Si Edwin Ermac nga maoy pangulo sa Traffic Enforcement Agency of Mandaue (TEAM) nga nahinabi sa Banat Manobela mipasabot nga   napugos na gyud sila sa pagdangop sa korte tungod sa pipila ka mga drayber nga wala magtagad sa citation tickets nga giisyu sa traffic enforcer ngadto kanila.

Hinuon daghan nang mga traffic violators nga nadakpan ang gipangunayan og pag-adto sa city treasurer’s office aron paninglon sa ilang multa apan duna gihapo’y uban nga nagpaugat lang ug daw wala motahod sa traffic ordinance sa siyudad.

 Si Ermac mipasabot nga sagad sa kalapasan nga nahimo sa mga drayber  aduna ra untay multa nga P200 apan tungod kay gamay ra lagi wala respetoha sa mga abusadong drayber ang maong multa.

Apan tungod sa kadugay na sa mga buwan ug katuigan nga wala sila magtagad niini, mitubo ang balayrunon subay sa nalatid sa ordinansa maong ang uban miabot na og tag P2,000 ngadto sa P5,000  kada usa.

Apan bisan pa man gipahibalo na sila bahin niini, mipatigbabaw ang pagkagahi og ulo sa mga drayber ug gibalewala lang gihapon ang maong balayranan hinungdan nga ilaha nang gisang-at ang kaso ngadto sa korte.

Karong mosunod nga mga adlaw daghang mga drayber, pribado, pasaheroan man o mga drayber sa kompanya ang gipaabot nga pang-arestuhon  aron sila pugson sa pagbayad sa ilang multa o ba kaha i-revoke ang ilang lisensya o pagkabilanggo subay sa kung unsay nalatid sa ordinansa sa siyudad. (BANAT NEWS)