Managsuong gunmakers sa Danao nadakpan

CEBU, Philippines - Duha ka managsuon ang gidakop sa mga sakop sa Criminal Investigation and Detection Group (CIDG) 7 tungod sa pagpanghimo og mga paltik nga armas diha sa Barangay Taboc, sa Danao City.

Ang mga operatiba sa CIDG armado og search warrant nga giluwatan ni Judge Teresita Galanida sa Regional Trial Court Branch 56 sa Mandaue City pinasubay sa kalapasan sa Presidential Decree 1866 as amended Republic Act 8294 o illegal possession of firearms.

Ang mga nadakpan giilang sila si Ronito Pasana, 41, ug maguwang niining si Tomas Pasana, 46, pulos molupyo sa sitio Tac-an sa maong barangay.

Matud pa sa hepe sa CIDG 7 nga si Sr. Supt. Ritchie Posadas  nga nakuha gikan sa mga suspek ang nagkadaiyang mga way lisensyang mga armas, mga  magazines, mga bala, ug mga gamit sa paghimo og armas.

Lakip sa mga nakuhang ebidensya naglakip sa parte sa nagkalain-laing mga armas, lakip na ang 150 ka bala sa mga nagkalain-laing kalibre, barrels, metal pattern, magazines nga mokantidad og P20,000, push drill balor P12,000, metal grinder nga balor P25,000 ug uban pang gamit matud pang Posadas.

Ang pagronda gisaksihan sa mga tanod sa barangay nga sila si Joel Almendras ug Junriel Ypil.

Matud pang Posadas, si Ronito maoy gitumbok nga supplier sa mga magazines sa armas diha sa mga silingang lungsod sa Danao.

“Three years na sila nag-manufacture og mga pusil especially magazines. Usa sila sa mga dagkong supplier og magazines diha,” sumala pang Posadas. Si Ronito miangkon sa maong salaod ug mibutyag nga mokita lang sila og P1,500 sa paghimo og mga magazines kada semana.

“Mas sayon man gud kung naa ra ka magtrabaho sa balay,” matud pang Ronito kinsa mitug-an nga lisod alang kanila ang magpa-lisensya sa pagpanghimo nila og gun parts.

Ang kampanya kontra pagpanghimo og mga armas sa Danao gihingusgan tungod sa nagsingabot nga Synchronized  Barangay ug SK Elections sa Oktubre.(/EIM) (BANAT NEWS)