Krimen sa CV misaka-PRO7

CEBU, Philippines - Misaka ang krimen dinhi sa Central Visayas gikan sa bulan sa Enero hangtud sa bulan sa Hulyo sumala pa ni Sr. Supt. Armando Radoc, ang pangulo sa Regional Investigation and Detective Management Division sa Police Regional Office-7.

Base sa ilang talaan, nag-unang krimen ug maoy dunay labing daghan nga kaso mao ang mga ginagmay nga mga pagpagawat nga miabot og 5,395 ka mga kaso. Sunod niini ang mga kaso sa physical injuries nga 4,788 ug pagpanulis nga 2,532.

Gipasabot  hinuon ni Radoc nga misaka ang maong crime statistics tungod kay bisan kadtong mga ginagmay’ng kaso nga barangay level ilang gilakip sa ilang listahan subay sa kamandoan sa PNP Chief.

Samtang si Deputy Chief sa Regional Intelligence Division Supt. Rex Derilo mipadayag usab nga ila karun nga gisusi ang giingong tulo ka dagkong sindikato nga maoy utok sa mga petty crimes dinhi sa Sugbu. Matud pa niya nga mga bata maoy gigamit sa maong sindikato tungod kay dili man sila mataral sa hukmanan kun madakpan subay sa Juvenile Justice Law.

Nabantayan usab nga misaka ang mga kaso sa mga langyaw nga nangreklamo nga sila gikawatan sa mga minors apan nagduda si Derilo nga hinimo-himo lang kini aron makakuha sila og police reports aron maka-claim og insurance sa ilang nasud. (/EIM) (BANAT NEWS)