Konsehal nga armado’g KG9 automatic sikop
CEBU, Philippines - Nasikop sa mga sakop sa kapolisan ang usa ka konsehal sa lungsod human kini masakmiti og armas atol sa gipahigayong checkpoint didto sa barangay Ipil, lungsod sa Carmen kagahapon.
Ang nasikop nailhan nga si James Camara, 45, molupyo sa maong lungsod ug giingong konsehal.
Ang hepe sa kapolisan sa lungsod sa Carmen Police Station nga si Chief Insp. Alvin Balio mibutyag sa Banat News nga kanunay sila nga nakadawat og report bahin sa kanunay nga magpabuto sa iyang armas ang suspek.
Si PO3 Roger Delan usa sa mga nakakita kang Camara nga nagbitbit og armas uban sa mga higala niini sa miaging adlaw. Dugang pa ni Balio nga kagahapon nakadawat sila og text gikan sa iyang tawo nga si Camara misakay og multicab nga may plate number nga YKY535 nga nagtakin og armas de fuego.
Diha-diha mipahigayon og checkpoint si Balio uban sa iyang mga tawo sa boundary sa barangay Ipil ug Poblacion.
Pag-abot sa multicab nga gisakyan ni konsehal Camara ila dayong gihiling ug didto nasakpan nila sa akto ang dala nga armas sa konsehal nga mao ang KG9 automatic rifle.
Matud pa ni Balio nga gikatahong nagdumili pa unta sa paghatag sa iyang armas ang konsehal apan ila kini nga nakuha human sa ilang layog kay walay mga papeles ang maong armas.
"Wa siya dayun mi-submit sa iyang firearm, naglayog pa mi kadyot ana niya. Pagkabantay niya nga porsegido kung modakop niya didto na niya gihatag," pasabot pa ni Balio.
Samtang gi-impound usab ang sakyanan kay wala siya makapakita og rehistro ug uban pang papeles.
Tungod kay misaka ang dugo niini dali nila kining gidala sa Danao City District Hospital apan gibalhin kini sa pribadong tambalanan sa Sugbo.
Gipasabot usab ni Balio nga ang ilang pagkasikop sa konsehal lehitimo tungod kay mipahigayon sila og checkpoint niadtong tungora sukwahi sa gikatahong pangangkon sa konsehal nga illegal arrest ang gihimo sa kapolisan. (BANAT NEWS)
- Latest
