Lapulapu CH mihatag og konsumo sa apektadong mga mananagat

CEBU, Philippines - Ang siyudad sa Lapulapu mitunol og hinabang alang sa 1,097 ka mga tawo sa 247 ka pamilya nga naapektuhan sa oil spill gikan sa nalunod nga barko diha sa Lawis Ledge sa dakbayan sa Talisay.

Matud pa ni Jonjie Gonzales ang Public Information Officer sa dakbayan sa Lapulapu base sa talaan sa Department of Social Welfare Services o DSWS sa Lapulapu 247 ka pamilya ang naapektuhan sa pagkuyanap sa lana sa kadagatan diin kasagaran sa mga naapektuhan ang mga mananagat.

Gumikan niini nakahunahuna si Lapulapu City Mayor Paz Radaza sa paghatag og suporta sa mga apektadong pamilya pinaagi sa pagpanghatag og bugas ug delata.

Matud pa ni Radaza makatabang na kini bisan sa pipila ka adlaw nga dili pa makapanagat ang mga apektadong pamilya. Nasuta hinuon sa Task Force Kalikasan nga wala nay peligro ang kadagatan sa siyudad tungod sa oil spill ug mahimo nang makapanagat pagbalik ang mga mananagat. (BANAT NEWS)