Luigi ug Durano midepensa sa ilang PDAF
CEBU, Philippines - Natagamtaman sa katawhan sa ilang distrito ang mga proyekto nga gipatuman sa mga ahensiya gamit ang Priority Development Assistance Fund (PDAF) sa mga kongresista.
Kini ang gipadayag nilang Kong. Gabriel Luis Quisumbing ug kanhi kongresista, karon Bise Mayor Ramon, “Red†Durano VI, sa dakbayan sa Danao.
Sila si Quisumbing ug Durano kauban nilang kanhi kongresista Eduardo Gullas ug Nerissa Soon-Ruiz kinsa mga Sugbuanon nga gilambigit sa giingong sayop nga paggasto sa ilang pork barrel fund nga gipaagi sa mga non-government organizations.
Matud pa ni Quisumbing nga sayop ang maong taho sanglit ang proyekto nga gigastohan sa iyang pundo nahidangat kini sa iyang distrito. Si Atty. Jocelia Bighani, chief of staff ni Quisumbing, nipasalig nga makapakita sila og kamatuoran sa pagpatuman sa mga proyekto.
Si Durano mikompirmar usab nga nakahatag siya sa iyang pundo ngadto sa Philippine Forest Corporation.Ang PFC ang nipatuman sa mga proyekto sama sa flood control, biodiesel production ug disaster mitigation programs.
Gawas niini sumala pa ni Durano nga ang PFC usa sa mga ahensiya nga gitahasan sa pagpatuman sa proyekto nga gigastohan sa ilang PDAF.
Sayo niini si Gullas mihimakak usab nga bogus ang mga NGO nga nipatuman sa ilang mga proyekto sanglit accredited kini sa mga ahensiya sa gobyerno nga hingtungdan.
Nagkalapad ang panawagan sa pagwagtang sa PDAF sa mga senador ug mga kongresista human nabutyag ang mga pag-abuso sa paggasto niini nga naadto lang sa bulsa sa ubang tawo. (BANAT NEWS)
- Latest
