1 angol, 15 ka balay ugdaw sa sunog

CEBU, Philippines - Naangol  ang  usa  ka  tawo,  samtang 15  ka  balay       ang  naugdaw  sa sunog  nga  miigo  sa mga  dakbayan  sa Sugbo  ug Danao kagahapon.

Ang  sunog  nga  miigo  sa  sitio Bagong  Buhay  sa barangay  Carreta  sa dakbayan  sa Sugbo,14 ka  balay  ang  hingpit nga  naugdaw  ug  may  usa  nga  igo  lang  nakan-an  sa kayo.

Samtang  usa  ka  balay ang  naugdaw  ug  usa  usab  ang  igo  lang  nakan-an didto  sa  sitio Quarry,  barangay  Looc, dakbayan  sa Danao.

Si SPO1 Cristopher Orbeso  sa kabomberohan  sa dakbayan  sa Sugbo  miingon  nga nadawat  nila  ang  alarma  sa  sunog  sa alas 2:18 sa hapon  ug  napawong ang  kayo  sa  alas 2:54 sa hapon.

Ilang  giisa  ang  alarma  sa Task Force Alpha  busa  dali  ra kaayo  napawong  ang  kayo  human  maugdaw  ang  14  ka balay.

Si Cresente  Durano, 67, naangol  dihang  nahislot  ang  iyang  panit  nga nasilab    sa kayo. Iyang  giangkon  nga  didto  magsugod  ang  kayo  sa ilang  balay  ug  maoy  iyang  namat-an  nga  nagsiga  na  ang  iyang  gihigdaan.

Mitimbakuwas  siya og  bangon  apan  napaso  gyud  sa kayo  ang  iyang  buko-buko  ug  ubang  bahin  sa lawas.

Nagduda  si  Durano  nga  linya  sa kuryente maoy  depektuso  sa ilang  balay  nga  maoy  sinugdanan  sa sunog.

Samtang  si  Mayor  Michael  Rama  miduaw  sa  maong  dapit  ug  nagkanayon  nga  tun-an  sa konseho  ang  pagpatuman  sa reblocking  sa maong   lugar.

Kini  aron  nga  may  agianan  ang  trak  sa bombero  kun  masunog  kini  pag-usab.

Samtang  didto  sa Danao,  balay  ni Ronie  Mata  ang  naugdaw.

Ang  maong  balay  gihimong  baligyaanan  sa  binotelyang  gasolina  ni Llyod Avila  nga  maoy  nag-abang  niini. Si SFO2 Socrates  Cane, imbistigador  sa kabomberohan  sa Danao Fire Station  miingon  nga  ang  maong  sunog  ilang  gipaubos  sa 2nd alarm  ug  dali  ra kining  napawong  sa kabomberohan  sa barangay  Poblacion, Danao.

Apan  ang  tapad  niining  tindahan  sa motorsiklo,  nakan-an  usab  sa kayo  hinuon wa maugdaw.

Miingon  si  SFO2 Cane  nga  nahitabo  ang  sunog  dihang  miulbo  og  kalit  ang  gasolina  nga  gihuwad  gikan  sa barel ngadto  sa  botelya.

Matud  pa  ni  SFO2 Cane  nga  maayo kay  naka-ikid  si Avila  ug  nakadagan busa  wa  mahilakip  sa  pagkasunog.

Gituohan  nga  dihang  nayabo  ang  gasolina  may  nahiagi  nga  nanigarilyo  busa  gidakop  ang  kayo  niini  ug  misilaob,  sumala  ni SFO2  Cane. (BANAT NEWS)