Bana ug ‘kabit’ gipadakop sa asawa

CEBU, Philippines - Usa ka ginang ang mipadakop  sa iyang bana ug ang dalagang puyo-puyo niini sa miaging tungang gabii diha sa gipuy-an sa duha sa sitio Canipaan barangay Cogon Pardo, dakbayan sa Sugbo.

Ang mga nadakpan giila nga sila si Elmer Segubal Bejec, 38, lumolupyo sa nahisgutang lugar kuyog sa iyang hinigugama nga si Kristina Hermosilla Enriquez, 23, ug lumolupyo sa barangay Tawason dakbayan sa Mandaue.

Ang ginang nga Juanita Bejec, 48, midangop sa Cebu City Police Office (CCPO) ug nagpatabang kang Chief Inspector Aileen Recla sa Investigations Division Management Bureau (IDMB) aron ipadakop ang iyang bana. Nasakpan gyud sa akto sa ginang ug sa mga polis nga ang iyang bana ug ang babaye nagpuyo gyud sa maong balay nga daw magtiayon.

Kasong kalapasan sa Article 334 sa Revised Penal Code kon Concubinage ug Adultery ang gikatakdang ipasaka batok sa duha. (BANAT NEWS)