Gitigbas sa kapuyo ulo paksit

CEBU, Philippines - Napaksit ang ulo sa usa ka  ulitawo  human kini tigbasa sa iyang kapuyo kay  gibunalan ang ilang  anak  didto sa ilang pinuy-anan sa barangay Maton-og , lungsod sa Balamban niadtong Huwebes sa alas 10:30 sa buntag.

Ang biktima mao si Avelino Pacquiao, 21, ulitawo apan dunay kapuyo,  nagtrabaho sa Tsunishi Heavy Industries  sa lungsod sa Balamban.

Ang suspek mao  si Conception Clarin alyas Cony, 29,  ug nagpuyo  sa maong lugar tipon  sa biktima.

Si PO2 Godofredo Dumdum sa Balamban Police Station  mibutyag  sa  Banat News  nga  ang biktima ug ang  suspek busy kaayo sa ilang gimbuhaton sa balay sanglit day -off man sa biktima sa maong  higayon.

Apan ang ilang dos anyos nga anak lalaki nagduwa- duwa ug gipamungkag ang mga butang sulod  sa ilang balay.

Gibadlong  kini  sa  biktima  apan  wala mopatuo  busa  gisapot  ug mikuha sa iyang senina dayun gilubid   ug  gibunal  sa ilang anak  ug  misiyagit  sa kasakit  ang  bata.

Ang suspek nga nakakita midagan  sa kusina dayong kuha og sundang   ug  gitigbas ang biktima.

Nasagang  niini  ang  sundang  busa  bukton  niya  ang  nasamad.

Apan  sa  ikaduhang  pagtigbas  naigo  kini sa tuong bahin sa ulo   ug   napaksit apil ang dunggan.

Ang biktima daling gihatud sa Balamban District Hospital samtang ang suspek gidakop sa kapolisan .

Ang biktima dili intresado nga mopasaka og kaso sa iyang kapuyo   busa gitakda kining buhi-an sa kapolisan karong adlawa.(/WC) (BANAT NEWS)