Mag-uuma giluba kritikal sa silingan

CEBU, Philippines - Kritikal ang kahimtang sa usa ka mag-uuma human kini unaya og dunggab sa laing mag-uuma  samtang  nag-away  gumikan sa kahubog  sa bino  nga  ilang  giinom  didto  sa   barangay Cabcaban, sa lungsod sa Tuburan niadtong Huwebes sa alas 7:00 sa gabii.

Ang biktima mao si Ronnie Gadia, 34, samtang  ang suspek mao si Hilario Dabon, 36, pulos minyo ug  pulos  mag-uuma   nga  managsilingan sa Cabcaban.

Si PO1 William Guanzon sa Tuburan Police  Station mibutyag  sa  Banat News   nga ang biktima ug ang suspek nagkasinabot   nga  maglingaw lingaw og inom hangtud nga nagkalalis dihang nangahubog na.

Ang maong panaglalis misampot  sa   dakong  away   hangtud nga ang suspek nakahukom  nga muona sa pagpauli aron paglikay sa gubot.

Dugang aligasyon sa suspek nga samtang naglakaw siya sa dalan paingon  sa ilang  balay nabantayan niya nga gisundan siya   sa biktima ug nagdala  og mga kauban.

Matud sa suspek dihang mipaduol kini  kaniya, iya dayung giunhan og ilog ang gibitbit nga kutsilyo sa manghud sa biktima.

Iya  kining  giduslak   sa biktima nga paingon unta   nga mo-atake   kaniya kay milaban sa manghud nga iyang gikuhaan og kutsilyo.

Naigo sa tuong bahin sa lawas  ug  dihang mibuhagay  ang  daghang  dugo  mikabad  og  dagan  pahilayo  sa maong  lugar ang  suspek.

Ang biktima gihatud sa mga molupyo   ngadto sa Tuburan District Hospital ug padayon pa nga giatiman sa mga doctor.

Samtang ang suspek nadakpan atol sa hot pursuit operation nga gilusad sa kapolisan ug nabalhug na karon sa karsel samtang gihikay ang tukmang sumbong nga ipasaka batok   kaniya. (/WC) (BANAT NEWS)