Ro-Ro nga barko sa San Remigio nasangad

CEBU, Philippines - Usa ka roll-on roll-off (RORO) vessel ang nasangad 200 metros gikan sa pantalan sa San Remigio kagahapon  samtang padung unta molawig sa Leyte.

Sumala pa sa report sa GMA News.Tv, ang nasangad mao ang Super Shuttle Ferry 10 nga gipanag-iya sa Asian Marine Transport.

Hinuon luwas ra ang 63 niini ka mga pasahero ug 18 ka tripulante  atol sa maong aksidente ug dali ra silang gipabalhin og laing barko.

Padayon pang mihimo og imbestigasyon ang Philippine Coast Guard sa maong hitabo.

Presko pa kaayo sa panumdoman sa mga Sugbuanon ang trahedyang nahitabo diha sa Lawis Ledge diha sa kadagatan sa Talisay City nunot sa panagbangga sa MV Saint Thomas Aquinas 1 ug cargo ship MV Sulpicio Express 7 niadtong Biyernes sa gabii.

Mikalas kini og 66 ka tawo ug 53 pa ang padayong gipangita. (Gikan sa Wires/EIM)

Tinidor gitusok sa 70-anyos sa iyang kinatawo

Usa ka 70- anyos nga lalaki ang nalandig sa Emergency Room sa Canberra Hospital human niya gitusok ang iyang kinatawo og tinidor nga may gitas-ong 10 sentimetros.

Matud pa sa International Journal of Surgery Case Reports sa miaging bulan, ang tinidor gituyo og tusok sa maong tiguwang sa iyang kinatawo aron maka-angkon siya og katagbawang sekswal.

Apan paglabay og 12 ka oras samtang nagtaop ang tinidor sa buslot sa iyang kinatawo wala na siya makaagwanta pa og nanawagan og ambulansya aron magpa-opera.

Human sa komplikadong operasyon natangtang ra gyud ang maong tinidor. Matud pa sa taho nga wala na kinahanglana ang pagtastas sa kinatawo sa lalaki ug nakauli ra kini human sa operasyon.

Dugang pa sa taho nga ang motibo sa pagtuslok og nagkalain-laing mga butang sa kinatawo sa lisod kaayong sabton. (BANAT NEWS)