Kawani sa Talisay naghuot pagkobra sa suweldo

CEBU, Philippines - Naghuot  sa buhatan  sa city treasurer kagahapon ang mga kawani sa City Hall kinsa mikubra sa ilang mga sweldo.

Gikan sa hagdan dapit sa buhatan sa bise mayor paingon ngadto sa cash division  naglinya  og taas kaayo ang mga kawani.

Gani maglisud na sa pag-agi ang dunay tuyo ngadto sa buhatan sa mayor ug sa uban pang mga buhatan.

Usa ka drayber sa solid waste ang giatake sa iyang sakit human kini milinya aron mokubra sa iyang sweldo sa milabay’ng panuweldo   nga  huot  kaayo.

Sa maong sitwasyon si Mayor Johnny De los Reyes misusi  sa cash division ug nasuta nga tulo lang ka tawo ang nanghatag sa sweldo.

Si Talisay City Public Information Officer (PIO) Vincie Monterde mibutyag nga ipausab sa mayor ang sistema sa panuweldo sa kawani aron dili na kini maghuot.

Si Talisay City Treasurer Emma Macuto misugyot sa mayor nga unom na ka tawo ang mohatag sa suweldo.

Ila usab  nga  otorisahan ang  mga  department heads nga mao na lay  mohatag sa suweldo sa mga kawani nga ubos sa ilang departamento.

Naglaraw  usab  sila  nga ang  maong  mga suweldo  ipaagi   sa automated teller machine (ATM). Apan si Monterde nagkanayon nga dili puwede nga isulod sa ATM ang mga suhol  sa job order tungod kay walay kontrata ang siyudad kanila.

Hinuon ang mga sweldo sa mga regular nga kawani maoy gipaagi sa ATM. (BANAT NEWS)