PSACC (Sulpicio) wa mosanong sa tawag sa Kapitolyo

CEBU, Philippines - Samtang nagkara-kara ang gobiyerno ug mga pribadong grupo sa search and retrieval operations ug pag-atiman sa mga survivors sa nalunod nga barkong MV Saint Thomas Aquinas ingon man ang problema sa oil spill, wala magpakabana ang Philippine Span Asia Carrier Corp. (kanhi Sulpicio Lines).

Si Governor Hilario Davide III nagkanayon nga ang 2GO group, tag-iya sa MV Saint Thomas Aquinas aktibong mitabang sa operasyon, ang PSACC wa gyud makig-estorya kanila hangtud ning mga panahona.

Ang PSACC maoy tag-iya sa MV Sulpicio Express Siete nga nakabangga sa MV Saint Thomas Aquinas niadtong Biyernes sa gabii diha sa Lawis Ledge sa Talisay City.

"Regretably, they have not as so far as the command center is concerned," matud pang Davide dihang gipangutana kung mitabang na ba ang PSACC.

Matud pang Davide nga human sa pagkahitabo gimandoan niya si Provincial Disaster Risk Reduction Managment Council head Neil Sanchez nga tawgon ang duha ka kompanya apan bugtong ang 2GO lang maoy misanong.

"I have yet to see a representative nila. Nobody has come forward gikan nila," matud pang Davide. (AJ De La Torre/EIM)

Kapitolyo , Cordova nag-deklarar og state of calamity

Gipaubos na sa state of calamity ang tibuok lalawigan sa Sugbo human sa trahedya sa panagbangga sa M/V St. Thomas Aquinas ug Sulpicio Express Siete nga niresulta sa pagkalunod sa nahauna.

Ang hunta probinsiyal sa Sugbo ang nipasar sa deklarasyon pinaagi sa resolusyon nga giduso ni Bokal Thadeo Ouano nga naghatag usab sa gahom ni Gob. Hilario Davide III nga makagamit sa Local Disaster Risk Reduction and Management Fund (LDRRMF) nga gitawag usab sa calamity fund.

Si Bokal Raul “Yayoy” Alcoseba mikwestiyon kung nganong ang tibuok lalawigan sa Sugbo ang ideklarar nga ang apektado mao man lang ang dakbayan sa Talisay ug lungsod sa Cordova.

Apan si Bokal Peter John Calderon nga usa sa nangamahan sa resolusyon mipasabot nga magamit lang ang calamity fund kung dunay deklarasyon nga tibuok lalawigan ang apektado. Si Bokal Julian Daan misugilon nga daghang mananagat sa dakbayan sa Talisay ang apektado ang panginabuhi sanglit wala nay mamalit og isda sa kabalaka nga nakakaon kini og patay’ng lawas sa mga biktima sa trahedya.

Si Calderon ug Bokal Sun Shimura misugyot nga tagdon gyud sa Provincial Social Welfare and Development Office ang kahimtang sa mga mananagat dili lang ang ayuda sa mga biktima sa trahedya. Si Bise Gob. Agnes Magpale miingon nga ang PSWDO ang mosusi kung pila gyud ang panginahanglan nga gastohan sa calamity fund.

Gipahibawo si Davide nga adunay igong pundo nga magamit sa calamity fund nga mosobra sa P100 milyones samtang P30 milyones niini ang magamit dayun sa dinaliang panginahanglan. Giklaro ni Davide nga gideklarar ang tibuok lalawigan sa Sugbo isip panagana nga moabot sa laing dapit ang pagbanaw sa lana sa barko sa kadagatan gawas sa dakbayan sa Talisay ug lungsod sa Cordova. Si Mayor Adelino Sitoy mibutyag nga giaprubahan sa konseho sa Cordova kagahapon ang pagdeklarar og state of calamity aron magamit ang pundo sa calamity fund sa mga lakang nga himoon.           

Si Sitoy uban sa mga kapitan sa kabarangayan ug presidente sa mga kahugpungan sa mga mananagat mitambong sa command conference sa Kapitolyo aron pagpaabot sa nasinati nilang problema. “Dili Lalim ning problemaha kay hasta ang mga kinhason, lato, bakasi nang ok ok na, hasta ang lusay kadtong mga lambay dili na maila kay naputos na og krudo,”dugang asoy ni Mayor Sitoy. Ang apektadong mga barangay naglakip sa barangay Gabi, Alegria, Poblacion, Buagsong, Day-as, Catarman, San Miguel ug Pilipog. (BANAT NEWS)