Duha gipamusil angol sa sikyu
CEBU, Philippines - Duha ka mga lalaki ang naangol dihang gipamusil kini sa naghuramentado nga gwardiya didto sa barangay Sabang siyudad sa Danao niadtong Sabado sa alas 10:35 sa gabii.
Ang mga biktima mao si Jesus Alcos,54 , ug Johnrey Capuyan, 33, pulos minyo ug managsilingan sa maong dapit.
Samtang ang suspek mao si Joel Nurab,37, minyo, nga nagpuyo sa Highway Looc siyudad sa Danao ug security guard.
Si PO2 Roselo Campo sa Danao City Police Station mibutyag sa Banat News nga ang mga biktima igo lang namalit og sigarilyo sa usa ka tindahan sa maong lugar.
Unya ang suspek nga hubog naatol nga nag-wild sa maong higayon ug sa wala’y igong hinungdan gipamusil niini ang mga biktima.
Si Alcos naigo sa tiyan, samtang si Capuyan nasabak usab sa lubot.
Ang suspek nga nagdala usab og granada misuway unta sa pag-eskapo apan nadakpan sa mga polis atol sa hot pursuit operation. Nasakmit gikan niini ang kalibre 357 nga may upat ka buhing bala ug duha ka kabhang. Gawas sa granada may kutsilyo pa nga nakuha ang kapolisan gikan kaniya.
Gibalhug na kini karon sa karsel samtang gihikay na ang tukmang sumbong nga ipasaka batok kaniya. (BANAT NEWS)
- Latest
