HUDO sa Mandaue miatiman sa kapuy-an sa mga informal settlers

CEBU, Philippines - Ang buhatan sa Housing on Urban  Development Office  (HUDO) sa dakbayan sa Mandaue padayon nga nakiglambigit sa nagkadaiyang ahensiya sa kagamhanan  sa pagtubag sa panginahanglan sa mga informal settlers nga mahiklin gikan sa ilang gipuy-an nga  peligro. Kini ang gipadayag ni Tonyfet Juanico, chairman sa HUDO sa dakbayan kinsa miingon nga kauban  nila  ang City Social Welfare Office, City Engineering Office, General Services Office, Mandaue City Cooperative Office ug uban pa.

Matud pa niya nga adunay mga molupyo nga nagpuyo  sa Butuanon River, Mahiga Creek sa barangay Subangdaku ug Banilad nga gikinahanglan na nga  papahawaon  gikan  sa maong  mga  lugar.

Apan  matud  niya  nga  naangan-angan  ang  maong   buluhaton  tungod  sa tawhanong katarungan.

Gipasabot ni Juanico nga wala  pa maandam  paghinlo sa 6.5 ka ektarya  nga  relocation  site  didto sa barangay Paknaan nga  kabalhinan sa  mga  molupyo.

Sa pagkakaron  padayon  pa  ang   pag-abuno, pagpalapad sa dalan ug pagbutang og linya sa tubig ug kuryente  sa maong  lugar. Dugang pa niya nga ang mga molupyo sa ilang paghiklin  kinahanglan nga matubag  ang  ilang panginahanglan nga naglakip sa paghakot sa ilang mga butang, pag-atiman sa ilang panglawas, pagkaon ug uban pa.

Si Juanico miingon nga  giugmad   usab sa relocation  site  ang day care center sa kabataan.

Kini  aron  nga  ang  mga  bata  nga  angay  na  motungha  sa day care  may  kadangpan  didto  sa maong  lugar.

Si Edgar Sanchez nga maoy community coordinator sa HUDO sa dakbayan  miingon  usab  nga kadaghanan sa mga informal settlers sa dakbayan  ila  na  nga  nahugpong  alang sa  mga livelihood program.

Gitataw niya nga ang buhatan sa city cooperative  mao usab ang kasamtangan  nilang gisandigan sa paghatag og panginabuhi  sa mga molupyo nga mabalhin ngadto sa bag-o nilang pinuy-anan. (BANAT NEWS)