Illegal drug pusher sa Sta. Fe tiklo

CEBU, Philippines - Nadakpan sa buy-bust operation  ang gitumbok nga number one sa watch list sa kapolisan nga  mamaligyaay og shabu didto sa barangay Pooc, sa lungsod sa Sta. Fe, isla sa Bantayan niadtong Sabado sa alas 8:00 sa buntag.

Ang suspek mao si Dindo Espinosa, 31, ulitawo, ug nagpuyo sa maong lugar.

Nasakmitan  kini   og tulo ka pakite   nga  gituohang shabu, ingon  man  nakuha  usab  sa kapolisan  ang P500  nga buy-bust money. Si PO2 Eric Ilustrisimo, imbistigador sa Sta. Fe Police   Station  mibutyag  sa  Banat News   nga  adunay concerned citizen nga  mitawag sa ilang  buhatan   kinsa  nagpahibawo  kalabot  sa pagpamaligya og shabu  sa suspek. Daling gilusad sa kapolisan ang buy-bust operation   kansang  poseur buyer  usa  ka  bag-ong  polis  sa lungsod .

Kini  maoy  nakig transaksiyon sa suspek  nga  mopalit  og shabu. Dihang gitunol na sa suspek  ang usa ka pakite sa gituohang shabu gidawat usab niini ang P500  nga marked money. Dayon   gisinyasan   sa poseur  buyer  ang mga back up nga polis   ug gisikop  ang suspek.

Dihang  gikapkapan  kini  sa lawas  ug  mga  bulsa  nakuhaan pa gyud   og laing duha  ka pakite sa  shabu. Gibalhug na karon sa karsel ug gihikay na ang kasong ipasaka batok kaniya   karong  adlawa. Si PO2 Ilustrisimo  midugang  nga tulo lang ka pakite sa shabu ang nakuha gikan  sa suspek tungod kay naghurot- hurot na  ang  stock  niini atol sa pista sa barangay Pooc niadtong   Agosto 16. Ang kapolisan mitumbok sa suspek nga number one sa ilang order of battle tungod sa pagpamaligya  niini  og gidiling drugas. (BANAT NEWS)