Negosyante kahiusa sa kagamhanan pagpananom og kahoy

CEBU, Philippines - Nagkahiusa ang mga  sakop sa Mandaue Chamber of Commerce and Industry (MCCI) ug mga opisyal sa kagamhanan sa dakbayan sa Mandaue sa pagpasiugda og programa  alang sa pagpahiuli sa kalikopan.

Usa  niini  mao  ang   pagpananom og mga kahoy  sa dapit  nga gitumbok  sa  mga  kadagkoan  sa  maong  dakbayan.

Ang maong programa  maoy ilang  pagpakita  sa kusganon  nilang  suporta sa nasudnong kagamhanan nga  mitahas   sa Department of Environment and Natural Resources (DENR) sa matag rehiyon   sa  pagpalabong  sa kakahuyan.

Gipangunahan  ni  Konsehal Diosado Suico ug Association of Barangay Council (ABC) Federation President Ernie Manatad,  ang  pagpananom og mga kahoy nga  tugas, nara  ug uban  pa.

Didto  kini  nila  panisok   sa Vera States subdivision sa barangay Tawason sa dakbayan sa Mandaue   nga  may  pagtugot   usab sa tag-iya nga si Edgar  Castillo. Naglakip sa mga dagkong establisamento sa dakbayan nga miabag sa maong kalihokan mao ang San Miguel Corporation (SMC). Gipangulohan sa ilang press relation officer nga si  Gerlie Garces, ang  mga  kawani  sa maong  kompaniya sa   pagpananom  og  mga   punoan sa  kahoy.

 Ang maong programa   may  labot   nga  kalihukan  sa Charter Day anniversary sa dakbayan ug Business month   niining  tuiga.

Hinungdan nga ilang gihiusa ang ilang  kalihukan  ubos sa ilang tema karong tuiga nga “Buhayin ang Kalikasan.”

Ang SMC   nga  magsaulog usab sa ilang anibersaryo sa bulan sa Agosto mipahaum  sa ilang kalihokan   sa  pagsaulog sa Business Month sa maong dakbayan.

Isip sakop sa maong kahugpongan, nakighiusa usab kanila   ang mga tinun-an  ug mga magtutudlo sa  Tipolo Elementary School sa barangay Tipolo sa maong dakbayan  sa  pagpanisok  og mga  lubangon  sa nagkalainlaing  matang  sa kahoy. (BANAT NEWS)