CEBU, Philippines - Miabag usab si Mayor Jonas Cortes sa mga biktima sa trahedya sa kadagatan pinaagi sa pagpadala og medical team ug rescue team ngadto sa nalunoran sa barko nga St. Thomas Aquinas sa 2GO shipping sa kadagatan sa dakbayan sa Talisay.
Si Mayor Cortes personal nga miadto sa pier area human masayud sa maong trahedya sa alas 8:00 pasado ang takna niadtong Biyernes sa gabii.
Una niyang gipadala ang mga social worker ug ambulansiya nga mitabang sa pag-atiman sa mga biktima.
Mitabang usab kini sa mga sakop sa pamilya nga nagpangita sa ilang mga minahal sa kinabuhi nga kauban sa mga nabiktimang pasahero. Si Violita Cabada, pangulo sa City Social Welfare and Services sa maong dakbayan miingon nga ang iyang mga sakop nga nabansay sa pag-atiman sa mga biktima iyang gipadala sa command center sa dakbayan sa Talisay, pier area ug mga tambalanan sa dakbayan sa Sugbo.
Matud pa niya nga sa pagpang-rescue misalmot usab sa search and retrieval operation ang mga sakop sa Accident Control and Response Team (ACERT) sa Mandaue.
Gani kasamtangan kining nakiglambigit sa mga tinugyanan sa Command Center sa dakbayan sa Talisay.
“Our immediate concerned right now is stress debriefing for at least three days through a one-on-one counseling,†nagkanayon si Cabada sa iyang pamahayag.
Sa nasayran nga ang search, rescue and underwater retrieval operation nagpadayon kagahapon alang sa pagpangita sa mga pasahero sa nahiuban sa barko nga mitundag sa ilawom sa kadagatan sa Talisay.
Ang St. Thomas de Aquinas miunlod mga 15 ngadto sa 20 minutos human mabuslot ang kasko niini dihang nabanggaan sa cargo vessel nga M/V Sulpicio Express Siete sa miaging Biyernes sa gabii. (BANAT NEWS)