CEBU, Philippines - Usa ka gipasanginlang masiao runner gitabangan pagpusil patay samtang kini nagmaniho sa iyang motorsiklo diha sa barangay Doldol sa lungsod sa Dumanjug kagahapon sa alas 6:30 sa buntag.
Ang biktima mao si Crisostomo Delicanog, 34, nagpuyo sa barangay Kanghamawol sa Dumanjug.
Wala pa maila sa kapolisan ang tulo ka mga lalaking sakay sa usa ka motorsiklo nga kalit mibabag ug mipusil sa biktima.
Matud ni PO2 Ramon Chenil sa Dumanjug Police Station dihang nahinabi sa Banat News, ang tulo giingong nag-atang nang daan kang Delicanog.
Sumala pa nga unang naigo ang biktima sa liog ug nasarasay ug pagkahuman giduol sa duha sa mga gunmen ug gitiwasan pagpusil ang ulo niini dayong sibat palayo. Patay na pag-abot sa tambalanan si Delicanog.
Duha ka anggulo karon ang gitutukang motibo sa hitabo nga naglakip sa masiao ug posibleng love triangle tungod kay giingong dunay karelasyong minyo ang biktima. (BANAT NEWS)