Driver giiloga’g taxi sa pasahero

CEBU, Philippines - Midangop sa kapolisan ang  drayber human ang MRG taxi nga iyang gimaneho kalit   nga gi-carnap sa  wala pa hiilhing langyaw  didto sa  M.L, Quezon sa barangay Cabancalan, dakbayan sa Mandaue sa miaging  tungang gabii.

Si Jerwil Ycong, 28 , nga taga barangay Lawaan, dakbayan sa Talisay  midangop    sa  Presinto 3 sa Mandaue City Police Office (MCPO) sa barangay Casuntingan human   dagita  ang  iyang  gimanehong  taxi  sa iyang  pasahero  nga  usa    ka American national.

Matud pa ni PO1 Jay-R Galaben sa kapolisan sa Presinto 3 nga nahinabi sa Banat News nga  ang biktima  nagkanayon  nga   misakay   kaniya  ang  wala hiilhing  pasahero  sa dalan Mango Avenue sa dakbayan sa Sugbo ug nagpahatod sa dakbayan sa Mandaue.

Dugang pa ni PO1 Galaben nga dihang nahidangat na kini sa atubangan sa Cabancalan 1 Elementary School sa dalan M.L. Quezon,  ang maong langyaw nga hubog kalit lang nga nag-wild nga nakaaghat sa drayber sa paghunong   sa sakyanan  ug nanaug.

Apan  mipuli  og  lingkod  ang  maong  langyaw  sa lingkoranan  sa driver dayon  gipadagan  niini  ang  taxi ug  nahibilin  nga  nagtibi  ang  driver. Walay  laing  nahimo  ang  maong  driver  gawas  sa pagdangop  sa buhatan  sa kapolisan.

Si PO1 Galaben miingon nga ilang gipangita sa palibot ang  taxi sa biktima ug ilang napalgan alas 4:00 na pasado ang takna sa kaadlawon   nga giabandonar sa dalan A.S. Fortuna sa barangay Bakilid sa maong dakbayan. Padayon  pa  nga  giimbistigar  sa kapolisan  ang  maong  hitabo.  (BANAT NEWS)