Childwise Tourism ilusad sa Cebu

CEBU, Philippines - Ilusad karon sa Department of Tourism (DOT) ang  Childwise Tourism program dinhi  sa dakbayan  sa  Sugbo uban  sa nagkalainlaing ahensya  sa kagamhanan, mga ginikanan  ug  mga  estudyante .

Si Donald Balanhi, National Project Officer  sa  Childwise Tourism  sa nasud  miingon  nga  giandam  sa  DOT  ang  labing mabulokon  nga  paglusad  sa maong  programa  pinaagi sa motorkada  gikan    sa  lungsod  sa Cordova, dakbayan  sa Lapulapu, Mandaue ug  Cebu.

Ang  tanan  mag-abot  sa Cebu International  Convention Center (CICC)  diin  mikabat  sa duha ka  libo  ka  mga  estudyante  uban  sa ilang  mga  ginikanan  ang  mitambong.

Sa pakighinabi  sa Banat News kang Balanhi, atol  sa Kapihan  sa PIA ug DYMR  sa miaging  Miyerkules,  gibutyag  ni  Balanhi  ang  pagpakabana   sa  DOT  sa daghang  mga  kaso  karon  nga  giatubang  sa  mga  batan-on  nga  lalaki  ug  babaye.

Kini  tungod  sa pag-uso  sa child  trafficking , child abuse  ug  uban  pang  krimin  nga  naglambigit  sa mga  batan-on  nga  mugna  kasagaran  sa  mga  langyaw.

Tungod  niini  gidasig  ni Balanhi  ang  publiko  ilabi  na  ang  mga  tag-iya  ug tagdumala  og  mga  hotel,  motel  ug  uban  pang  mga  balay  patigayon  nga  usahay  adto  dad-on  sa  mga  langyaw  ang  ilang  biktimahonong  babaye  ug  mga  lalaki  nga  mosumbong  dayon  sa mga  otoridad.

Matud  pa  ni  Balanhi  nga  usahay  molampos  ang  mga  pagbinuang  sa  mga langyaw  sa  mga  batan-on  tungod  kay  gipasagdan  sila. Busa  miingon  siya  nga  kining  paglusad  nila  karon sa Childwise Tourism  kaabag  nila  ang  kapolisan,  mga magtutudlo, non  government organization (NGO) publiko  ug  tanang  katawhan  kinsa  nagmahal  sa  mga  kabataan.

Kini  bisan  dili  nila anak  kun  makita  nila  nga  kauban   sa  mga  batan-ong  lalaki  ug babaye  ang  mga  tiguwang  na  mga  langyaw,  kinahanglang  ireport  dayon  kini  ngadto  sa kapolisan, media, DOT  ug ubang mga ahensya  sa  kagamhanan  nga  nagpakabana  na  niini.

Miingon  si  Balanhi  nga  ang  kalampusan sa maong  programa  ug  proyekto  sa DOT  mag-agad  sa abag  sa tanan  sa katibuk-an.

Kini  ilang  gilusad  sa  pamasin  nga  mapakgang  na  ang  mga  pagpanglugos  ug  uban  pang krimin  nga  kasagaran  gihimo  sa mga  langyaw  ngadto  sa mga  batan-on  nga  Filipino sa nasud. (/WC) (BANAT NEWS)