Pagtubil sa LPG sa tangke sa butane gidili

CEBU, Philippines - Ang kabomberohan sa syudad sa Sugbo  gitakda  nga mosusi  sa giingong backyard refilling station sa mga  butane cannister gas ug  liquefied petroleum  gas (LPG) nga sagad mahitabo sa hilit nga lugar ning syudad.

Si Eulalio Muñoz ang hepe sa Regional Operation sa Bureau of Fire and Protection ( BFP)-7 nagkanayon nga ang ilang buhatan motabang sa pagsumpo niini  kay  usa kini  sa  mga  hulga sa sunog.

Gipasabot  ni  Muñoz  nga  disposable  ang  mga  sudlanan  sa butane  busa  angay  nga  human  og  gamit  niini  dihadiha  ilabay  kini  sa basura.

Apan  gumikan  sa report  nga  ang  mga  sudlanan  sa butane, refilan  usab  og  LPG, busa  miingon  si Muñoz  nga  usa  kini  ka  dakong  surambaw  ug ila  gayud kining  sumpoon.

Kini  aron kalikayan  ang  pag-ulbo  niini  ug mosangpot  sa dakong    sunog  nga  mougdaw  sa kabalayan  ug  usahay  misingil  og  kinabuhi.

Milusad  ang  BFP  og  surveillance operation sa pipila ka mga lugar ang adunay  nang-refill  og  LPG  sa  tangke  sa butane.

Iyang  giawhag  ang  publiko  nga  kun  anaa  kini  sa ilang  silingan,  ipahibawo  dayon  sa kapolisan, sa Department  of Energy (DOE) ug  BFP. (/WC) (BANAT NEWS)