1 patay sa 2 nga naghikog

CEBU, Philippines - Usa ang patay  sa duha  ka ulitawo  nga  naghikog tungod  sa gugma  sa managlahing  lugar  ning  lalawigan sa miaging  Huwebes.

Ang  nawad-an  sa kinabuhi  mao  si Annabelito Abalo, 20, ulitawo  nga  may  kapuyo  sa sitio Sambag,  barangay  Bulacao, dakbayan   sa Sugbo, samtang   si  Boy (di tinuod  niyang  ngalan) 16, taga  barangay  Poblacion,  Barili,  nasalbar.

Si Abalo nga nagselos  sa kapuyo, napalgan  sa iyang  mga  kauban  nga  nagbitay  ug  patay  na,  sulod  sa  Redoble Town House Construction  sa dalan  Rabaya, sitio  Nonoc,  barangay Tabunok,  dakbayan  sa Talisay  .

Bisan  og patay  na  gisuway  pa  gyud  og  sapwang  nila ni SPO1 Mikie Espina ug PO1 Edwin Campomanes ngadto  sa Talisay  City District  Hospital apan dead  on  arrival  kini.

Ang  kapolisan  nasayud  nga  selos  ang  hinungdan  sa maong  paghikog  kay  sa  wala  pa siya  magbitay,  nakita  niini ang  iyang  kapuyo  nga  may  kaestoryang  lalaki.

Hinungdan  nga  sa iyang  kaguol  naghunos  kini  sa iyang  kinabuhi

Samtang  si  Boy  kinsa  gibuwagan  ni Mary (di tinuod   nga  ngalan), 15,  iyang silingan  niya  ug  classmate  sa  eskuylahan.

Sa  kaguol  ni  Boy,  mikuha  kini  og  pisi, dayon  gibaat  sa  iyang  liog  ang tumoy   kansang  pikas  tumoy  gigaid  usab sa sagbayan  sa balay  sa apohan  niini  sa Poblacion, Barili.

Sayo  niini  naniudto  silang  duha  sa balay  sa apohan  ni  Boy  unya  pagkahuman  og  pangaon,  nagkalalis, dayon  nag-away  ug  gibuwagan  ni  Mary.

Milakaw  si Mary  apan  si  Boy  kinsa nagmahal  pag-ayo  sa babaye  gibati  og  kaguol,  nakahunahuna  sa paghunos  sa iyang  kinabuhi  pinaagi  sa pagbitay.

Nabati  ni  Mary  sa gawas  ang  kusog  nga  inagu  ni  Boy  hinungdan  nga  misaka  kini  sa taas  sa balay.

Dihang  nasuta  niya  ang  nahitabo  nga  nagbitay  na  ang  iyang  uyab  ug gamay  na lay  kuwang  mabugto  na,  misinggit kini  ug  nangayo  og  tabang  sa mga  silingan.

Ang  mga  silingan  nga abtik  usab  kaayo  nga  mitangtang sa pisi  gikan sa  liog  ni  Boy  ug  gihatud  kini  ngadto  sa Barili District Hospital apan  gipabalhin usab  dayon  ngadto sa Vicente  Sotto  Memorial  Medical  Center  sa dakbayan  sa Sugbo.

Naluwas  na sa kuyaw si  Boy. (/WC) (BANAT NEWS)