Pangulo sa VSMMC mokooperar sa Ombudsman

CEBU, Philippines - Opisyal sa Vicente Sotto Memorial Medical Center (VSMMC) mipasalig nga mokooperar sila sa bisan kinsa nga investigating committee kalabot sa giingong anomalosong paggamit sa pork barrel funds ni kanhi Cebu City South District Rep. Antonio Cuenco sa mga opisyal sa maong hospital.

“Wala pa mi nakadawat sa official report, but rest assured that the hospital will cooperate in any investigating committee,” matud pa ni VSMMC chief Dr. Gerardo Aquino Jr. Una nang gipadayag ni Deputy Ombudsman for the Visayas Pelagio Apostol nga ang Office of the Ombudsman sa Visayas mag case building sila sa maong issue human ang Supreme Court (SC) mi-affirm sa findings sa Commission on Audit (COA) nga napamatud-ang nakalapas ang upat ka opisyal sa VSMMC sa paggamit sa pundo sa pork barrel ni Cuenco.

“I think, i-klaro lang namu nga that finding of the COA was way back in 2004, and corrective measures were done. And the persons involved gi-question ni nila up to the Supreme Court maong nigawas ni siya karun,” matud ni Aquino.

Ang mga gikwestyong opisyal mao sila si Filomena delos Santos, Josefa Bacaltos, Nelanie Antoni ug Maureen Bien. Ang upat mao ang mga custodian ug disbursing agency sa Priority Development Assistance Fund (PDAF) ni Cuenco.

Matud ni Aquino nga si delos Santos ug Bacaltos miretiro na samtang si Antoni ug Bien nagtrabaho gihapon sa hospital.

Gi-refer sa SC ang findings sa COA ngadto sa Office of the Ombudsman para sa imbestigasyon ug posibleng prosecution sa kaso. Matud ni Apostol nga ilang gamiton ang mga newspaper clippings ug ang decision sa SC isip reference sa ilang case building. Makig-coordinate usab si Apostol sa COA ug ang output sa ulahi mao ang ilang himuong basehan sa ilang imbestigasyon. (/EIM) (BANAT NEWS)