5 mil kapin ka punoang marijuana gilarot
CEBU, Philippines - Kapin sa lima ka libo ka punoan sa marijuana ang nalarot sa pagpangronda sa kapolisan sa tulo ka mga Sityo sa barangay Basyaw, lungsod sa Badian niadtong Martes.
Ang hepe sa Badian Police Station nga si Insp. Edgar Labe maoy nanguna sa maong kalihokan uban sa mga sakop sa RPSB 2nd company nga nagbase saTunga, Moalboal.
Gironda nila ang maong mga lugar human nila madawat ang mga taho kalabot sa dagkong plantasyon sa marijuana sa mga Sitio sa Camboringkiw, Dals-ag ug Tap-ong mga bukirang lugar sa Badian.
Si PO1Welmar Bulahan sa Badian Police Station mibutyag sa Banat News nga alas 6:00 pa sa buntag migikan sa lungsod ang mga polis ug miabot kini didto niana nang pagka-alas 2:00 sa hapon .
Gisugdan nila og larot ang mikabat sa upat ka libo ka mga hamtong na nga mga punoan sa marijuana, samtang l,500 usab ang mga bag-ong tinanom hangtud nga kini nahuman nianang alas 5:00 pasado sa hapon.
Walay nadakpan nga mag-uuma ang kapolisan apan nailhan nila ang usa ka Erik Jomio, hingkod, mag-uuma, kinsa maoy ilang pasakaan og kaso .
Ang kapolisan nakahipos og lig-ong ebidensya batok kang Jomio nga gidungog usab nga tig-pananom og marijuana sa maong lugar.
Ang kapolisan padayon pang nag -monitor sa dugang pang umahan sa marijuana sa bukirang bahin sa maong lungsod. (BANAT NEWS)
- Latest
