3 poste sa kuryente nangatumba ug nagbrown-out

CEBU, Philippines - Tulo ka mga poste sa kuryente ang nangatumba human sa pagdahili sa yuta kagahapon sa buntag  sa sitio Tangub, barangay Lagtang, dakbayan sa Talisay  hinungdan  sa pagbrown-out  sa maong  mga  lugar.

Si Talisay City councilor Danny Caballero mibutyag sa Banat News  nga usa ka residente sa lugar nga si Girlie Estoy misulti nga usa sa maong mga poste  natabunan sa yuta, laing usa ang nabali, ug ang usa nahumol  sa sapa hinungdan nga mibuto ang fuse   ug napawong  ang  mga  suga.

Ang maong mga poste maoy gikonektahan sa main line sa kuryente gikan diha sa Lagtang paingon na ngadto sa mga bukirang barangay sa Jaclupan, Camp 4 ug Mainipis.

Matud  ni Caballero nga mitawag  siya sa buhatan sa Visayan Electric Company aron mahibalik dayon ang suplay sa kuryente sa nahisgutang mga lugar.

Gibana-banang mikapin sa 3,000 ka mga panimalay  sa nahisgutang mga barangay ang temporaryong walay kuryente kagahapon human matumba ang mga poste.

Si Doming Kunot, 37, helper sa back hoe sa QM Builder mibutyag sa Banat News nga niadtong higayona nagpatag sila sa yuta apan kalit lang midahili ang  ibabaw’ng bahin .

Hinuon walay  naangol kanila tungod kay  nakabantay sila niini ug nakalikay.   

Ang mga residente     dugay  na  nga  nangreklamo bahin sa kalapok panahon sa ting-uwan ug kaabog sa  karsada panahon ting-init tungod sa padayong pagkubkob sa bukid  sa pagpalapad sa karsada paingon  ngadto sa bukirang  mga barangay.

Gumikan  niini gipatawag  sa kagamhanan  sa Talisay  ang tagdumala  sa QM Builder nga maoy contractor sa road widening, Provincial Environment and Natural Resources (PENRO), Department of Environment and Natural Resources (DENR) ug Department of Public Works and Highways (DPWH) alang  sa usa ka miting  kagahapon  sa alas 3:00  sa hapon paghisgot  sa maong  mga  problema. (BANAT NEWS)