300 mil ka tawo motabang sa operasyon batok dengue

CEBU, Philippines - Mokabat sa 300 mil ka mga tawo ang boluntaryong molihok alang sa pag-arangkada sa unang hugna sa lapad nga operasyon batok sa dengue dili lang sa Sugbo kundili apil sa ubang dapit sa Central Visayas karong Sabado ug Domingo.

Kini ang gipahibawo ni Dr. Wyben Briones, ang pangulo sa dengue eradication campaign sa Rotary International District 3860, atol usab sa iyang pagdawat sa pasidungog sa 888 News Forum sa Marco Polo Plaza kagahapon nunot sa programang "Massive Larvicide Anti-Dengue Campaign."

Ang Rotary International, matud pa ni Briones maoy mogahin og P33 milyones nga kantidad sa larvicide nga gitawag og Temephos (abate) nga ipangapod-apod sa nagkalainlaing dapit sa rehiyon.

Ang Dengue-Free Philippines Movement gilusad sa miaging buwan diin upat ka hugna sa operasyon nga himoon karong Sabado ug Domingo, sa Oktobre 26 ug 27 karong tuiga, Enero 4-5 ug Abril 12-13 sunod tuig.

Matud pa ni Briones 50 ka kahugpungan gikan sa pribado ug publiko ang naglangkob sa kalihukan.

Ang taho sa Cebu City Health Department Epidemiology Statistics and Surveillance Unit kagahapon nagpakita nga adunay 1,297 ka kaso sa dengue ang dakbayan sa Sugbo samtang duha ang namatay. Kini mas ubos sa 2,145 ka kaso ug pito ang namatay sa niaging tuig. (BANAT NEWS)