Drug-free na ang dakbayan sa Toledo

CEBU, Philippines - Gipahibawo ni Mayor John Henry “Sonny” Osmeña niadtong Lunes sa gabii  nga drug free na ang Toledo City kauban ang hepe sa kapolisan sa dakbayan sa Toledo nga si Chief Insp. Michael Anthony Bastes.

Gipasidunggan ni Osmeña si Bastes ug kaubanan sa kalampusan sa pagronda ug pagkasikop sa duha ka giingong big time drug pushers nga nailhan nga sila si Ryan Menchavez sa sityo Luray I, barangay Poblacion, ug Virgilio Amaya sa sityo Tuba, barangay Ibo, dakbayan sa Toledo.

“Toledo is now drug free, wala na’y pusher sa Toledo kay gihurot og sikop. In Toledo there is no longer any shabu,” matud pang Osmeña.

Matud pa ni Osmeña nga nakahimo si Bastes sa iyang tahas nga sumpoon ang ilegal nga drugas sa dakbayan sulod sa 30 ka adlaw sa dihang iyang gipili isip hepe niadtong Hulyo 1.

“He did it, he cleaned up Toledo. It is now drug free, I am very happy and very proud about that,” sumala pang Osmeña. Gitug-an sa sekretarya ni Osmeña nga si Liza Rafols, igsoon sa bag-ohay lang namatay nga si konsehal Ricardo Rafols, nga naghitak gyud ang ilegal nga drugas sa ilang dapit.

Matud pa ni Bastes nga si Menchavez makadispatsar balor og P400 mil nga shabu.

Gikuyog ni Bastes ang iyang mga sakop kinsa iyang gihulagway nga eksperto sa operasyon batok ilegal nga drugas.

Si Osmeña mipasangil nga gipasagdan sa miaging mga politiko, kapolisan lakip na sa huwes ang maong problema human siya nasayod nga walay nataral sa bilanggoan sa kaso sa ilegal nga drugas.

Nagtinguha si Osmeña nga dugangan ang sakyanan sa kapolisan, kahimanan sa komunikasyon, mga armas ug ang kasamtangang 59 ka polis padugangan og 15. (BANAT NEWS)