CEBU, Philippines - Naukay ang mga tinun-an ug faculty staff sa usa ka pribadong tunghaan sa barangay Basak, dakbayan sa Sugbo gumikan sa paghikog sa usa ka bus driver niini sulod sa campus pasado alas 8:00 sa buntag kagahapon.
Ang naghikog giila nga si Alberto Secretaria, 58, lumad nga taga barangay Malolos, lungsod sa Barili ug bus driver sa maong eskuylahan sulod sa 23 na ka tuig
Ang kauban ni Secretaria maoy nakakita nga nagbitay na kini pinaagi sa pisi nga gihikot sa iyang likod ug gigaid usab ang pikas tumoy sa likod nga bahin sa generator set.
Si PO1 Michael Angelo Singson sa Homicide Section sa kapolisan nagkanayon nga ang biktima gikatahong naproblema bahin sa kuwarta.
Gani, may mga report usab nga dako og utang ang biktima sa tunghaan tungod sa tuition fee sa iyang anak.
Ang kapolisan sa Homicide Section mosuta pa sa hinungdan sa paghikog sa biktima ug kun wala bay foul play sa iyang kamatayon.
Ang management sa maong tunghaan nagdumili sa paghatag og komento kalabot sa maong insidenti. (BANAT NEWS)