Driver nawagtang uban sa 75 ka kahon nga beer gikiha

CEBU, Philippines - Kaso nga qualified theft  gipasaka  batok  sa  usa  ka driver  sa delivery truck kinsa   wala na igkita   uban  sa  gikarga  nga 75 ka  kahon nga botelya sa beer niadtong  Hulyo 31.

Si SPO3 Marcos Noval sa Investigation and Detection Management Bureau (IDMB) nga nahinabi sa Banat News miingon nga ang gipasakaan sa maong kaso mao si Rodel  Quitoy Torres, alyas Mac-Mac, 34 , ulitawo nga taga Kinalumsan, barangay Babag, dakbayan sa Lapulapu.

Si Mrs. Jocelyn Day, 39 , minyo nga taga dalan Joaquino sa barangay Mabolo, dakbayan sa Sugbo nga maoy tag-iya sa D’ Royal Mile Marketing Corporation  sa  dalan M.J. Cuenco Avenue sa dakbayan sa Sugbo maoy  amo   ni Torres.

Matud pa ni SPO3 Noval nga si Mrs. Dy  misumbong  nga si Torres maoy nagmaneho sa six-wheeler truck niini nga nagdala sa plate number UAG 771   nga  gikargahan sa 75 ka mga kahon nga botelya sa beer.

Ang  biyahe  niini   gikan sa San Miguel Corporation Complex sa barangay Tipolo, dakbayan sa Mandaue  paingon  ngadto  sa  ilang bodega nga nahimutang sa dalan M.J. Cuenco Avenue sa dakbayan sa Sugbo.

Apan  matud  pa ni Dy  nga  sukad  niadtong  higayona, Hulyo 31, alas 7:00  sa gabii nawagtang  na  ang  suspek,  uban  ang  sakyanan  ug  ang  mga  kargamento  niini.

Hinuon  miingon  si   Noval nga alas 2:00 sa hapon niadtong miaging Miyerkules sa joint follow up operation nga gihimo  sa kapolisan sa IDMB ug mobile patrol sa Mandaue City Police Office (MCPO) ang maong delivery truck nga gimaneho ni Torres ilang nakaplagan sa Cansaga Bridge sa barangay  Paknaan sa dakbayan sa Mandaue.

Wala  na  niini  ang  mga  kinahon  nga  beer  ug  mga  basiyo  na lang  ang ilang  nakita  sulod  sa maong  de karga.

Padayon  pa karong  gipangita  sa kapolisan  ang suspek. (/WC) (BANAT NEWS)