17 balay sa Toledo gilamoy sa sunog, 3 angol

CEBU, Philippines - Dise-syete ka panimalay ang naugdaw sa dakung sunog nga miangol usab og tulo ka mga tawo sa San Andres Soriano (DAS) Lutopan sa siyudad sa Toledo kagahapon sa alas 2:00 sa sayong kaadlawon.

Si SFO2 Constancio Alcover sa Toledo City Fire Department mitataw subay sa inisyal nga imbestigasyon nga iyang giduso sa Toledo City Police gibanabanang niabot usab og 700 mil pesos ang kinatibuk-ang danyos sa maong sunog.

Gawas sa gibanabanang 17 ka mga panimalay nga gihurot og lamoy sa kalayo duna usay tulo ang mga naangol nga giila nga sila si Margie Abalorio, Sunora Amihan ug Gemma Catam-isan, nagpuyo sa maong lugar. Hinoon luwas sa peligro ang mga naangol nga igo lang nakaangkon og gagmay’ng paso ug pangos samtang nagkabuang og salbar sa ilang mga butang dihang miulbo ang kalayo.

Subay sa spot report sa Toledo City Police nga giduso sa Operations Branch sa Cebu Police Provincial Office nga sa pasiunang imbestigasyon nagsugod ang kayo sa pinuy-anan ni Constancio Gomez ug dali kining mikaylap sa mga silingang pinuy-anan.

Hinuon mga alas 2:15 ang takna hingpit nga nakontrolar sa kabomberohan ang kalayo human kini giisa ngadto sa Task Force Alpha. Sa paghimo ning balita padayon pa ang imbestigasyon ni SFO2 Alcover pagtino sa hinungdan sa maong sunog. 

Samtang naugdaw ang usa ka bunkhouse sa nahitabong sunog kagahapon sa buntag diha sa barangay Linao, dakbayan sa Talisay nga midanyos og P6,000 ug walay gikataho nga mga naangol.

Si FO3 Omar Segovia mibutyag sa Banat News kagahapon nga ang maong bunkhouse gama kini sa light materials ug gipanag-iya sa Merlion Trader nga distributor og feeds sa mga manok ug baboy. Ang maong bunkhouse maoy gipuy-an sa mga handler sa manok sa Merlion Trader. Gituohang electrical misuse ang hinungdan sa sunog. (BANAT NEWS)