Anak sa kagawad gipatay sa hantakan

CEBU, Philippines - Patay ang anak sa barangay kagawad sa lungsod sa Argao samtang duha ang naangol sa pagpamusil nga nahitabu sa hantakan atol sa kapistahan sa lungsod sa Sibonga niadtong Sabado sa alas 3:00 sa sayong kaadlawon.

Ang biktima nga patay nang nadangat sa tambalanan mao si Mark Gomez, 30, taga Sityo Balandia, barangay Guiwanon sa lungsod sa Argao ug ang laing duha ka mga biktima nga napagan sa hitabo mao sila si Romewell Cueblas, 24, molupyo sa barangay Poblacion ug ang laing biktima mao si Acxell Suico Aguilar, 24, nagpuyo sab sa maong lugar.

Samtang ang suspek wala pa mailhi sa kapolisan tungod kay ang mga saksi diha sa maong sugalan pulos nangambot.

 Matud ni PO3 Ederlino Bacusmo sa Sibonga Police dihang nahinabi sa Banat News ang biktima nga si Gomez diha sa hantakan dihang miabot ang mamumuno  nga nisagol sa mga nanugal.

Apan matud pa pagkakita niini sa biktima deretso kining mibunot sa giluklok nga armas ug pusil ngadto kang Gomez tulo ka higayun tumong sa ulo samtang natapsingan sa ulo si Cueblas samtang si Aguilar naigo sab sa ubos nga bahin sa dughan.

Patay na pag-abot sa Carcar City District Hospital si Gomez samtang gibalhin sa tambalanan ang laing duha nga naangol.

Ang amahan ni Gomez nga si barangay Sumaguan kagawad Victoriano Gomez, misalig na lang sa kapolisan sa ilang imbestigasyon.

Apan dako ang iyang pagduda nga adunay kalambigitan sa ginadiling drugas ang kamatayon sa iyang anak tungod kay sa milabay’ng buwan iyang nasayran nga ang iyang anak adunay gikalalis nga tawo ug sa iyang pakisusi kabahin kini sa ginadiling drugas.

Ang inahan ni Gomez nga si Clara mipadayag usab nga dugay nang nasayod ang ilang pamilya nga tiggamitan og ginadiling drugas ang biktima ug gani nasulod na kini sa drug rehabilitation center apan wala sila masayod nga mibalik kini sa maong bisyo. (BANAT NEWS)