Negosyante gitulisa’g P210 mil

CEBU, Philippines - Nasakiyo  sa wala  hiilhing  mga  tulisan  ang  P210,000 nga salapi sa usa ka negosyanteng babaye kinsa  gitulis  didto  sa national  highway   sa barangay Guinsay, dakbayan sa Danao  sa miaging  Biyernes  sa alas 4:00  sa  hapon.

Si PO3 Romano Rosales sa kapolisan sa maong dakbayan miila sa biktima nga mao si Rizalina Requilla, 37, minyo,  nga  nagpuyo sa maong dapit.

Ang  mitulis  sa biktima   mao ang unom ka armadong mga lalaki nga nagsakay og tulo ka motorsiklo.

Matud pa ni PO3 Rosales nga nagpaabot ang biktima og sakyanan sa maong lugar  paingon sa dakbayan sa Sugbo apan kalit lang mitumaw ang unom ka armadong mga lalaki nga nagsakay og tulo ka motorsiklo.

Dugang pa ni PO3 Rosales nga ang usa sa mga nag-angkas sa motorsiklo maoy dali   nga  mikanaug ug giduol ang biktima nga nagsipit sa iyang shoulder bag.

Dayon   gitionan kini sa iyang  armas  de fuego  dungan ang pagdeklarar nga tulis.

Si PO3 Rosales miingon nga gibunlot sa tulisan ang shoulder bag sa biktima apan hugot usab niining gigunitan   sa ginang.

Gumikan  niini  kalit  nga gilangkat   sa    tulisan  ang bag   ug  nalamba  ang  biktima    sa karsada.

Tungod  kay  nabuhian  sa biktima  ang  bag,  abtik kining  gikuha  sa tulisan dayon  mibalik  og sakay  sa nagpaabot  nga  motorsiklo.

Gibiyaan  sa  mga  tulisan  ang   biktima  kinsa  gitabang   sa mga  silingan    ug  deretso  nga  gidala   sa tambalanan.

Padayon  pa  nga  gipangita  sa mga kapolisan  ang  maong  mga    tulisan.  (BANAT NEWS)