Muslim Community sa Lapulapu di gusto og gubot

CEBU, Philippines - Misaad ang mga kadagkoan sa Muslim community sa dakbayan sa Lapulapu nga moabag sila sa kapolisan kung dunay mga katahapang tawo sa ilang komunidad ilabi na kadtong gikan sa Mindanao nga bag-ong salta sa dakbayan.

Matud pa ni Lapulapu City Police Office director Sr. Supt. Rey Lyndon Lawas iyang gitahasan si PO1 Bashir Boriongan nga maoy makig-alayon sa mga igsoon niining Muslim alang sa kalinaw sa dakbayan sa Lapulapu.

Si PO1 Boriongan miingon nga iyaha nang nalukop ang tanang lider sa mga Muslim Community sa dakbayan sa Lapulapu ug misaad sila nga sila mismo ang mobantay sa ilang komunidad gikan niadtong mga dayo nga moabot sa ilang dapit.

Samtang si Hadji Marlon Usalani usa sa mga lider sa Muslim community sa merkado publiko sa dakbayan sa Lapulapu nga nahinabi sa Banat News mipadayag sa iyang kasagmuyo sa nahitabo sa Cotabato ug Maguindanao.

Matud niya nga hugot nila nga gikondenar ang binuhatang terorista nga namomba sa maong mga dapit.  Sagad sa mga namatay sa Cotabato City pulos mga Muslim ug walay kalambigitan sa mga tawong gidudahang maoy target sa maong pag-atake.

Hinuon mipasalig kini nga ang iyang mga kauban nga ania sa dakbayan sa Lapulapu buot og kalinaw ug panginabuhi lamang ang ilang tuyo alang sa ilang tagsatagsa ka pamilya.

Gikalipay usab ni Lawas ang pag-abag sa mga sakop sa Philippine Air Force ug Philippine Navy sa pag-monitor sa palibot sa isla sa Mactan. Ang maong pasalig sa Muslim community may kalambigitan kini sa migawas nga report nga dunay kinse ka mga terorista gikan sa Mindanao nga mopahigayon og test mission dinhi sa Sugbu. Ang kapolisan padayon pa sa ilang monitoring ug pagkompirmar sa maong report. (BANAT NEWS)