Drayber gitulis gipatay

CEBU, Philippines - Naputos sa samad dinunggaban ang usa ka taxi drayber human kini gitulis sa iyang pasahero pasado alas-7 sa miaging gabii samtang kritikal usab ang usa sa gipasanginlang tulisan human mabunali og bato sa mga mirespondeng mga drayber sa habal-habal diha sa Peace Valley Sudlon, Lahug ning dakbayan.

Ang taxi driver giila sa ngalang si Wilino Huntong, lumad nga taga Langub lungsod sa Asturias, kinsa naputos sa samad dinunggaban, samtang ang giingong tulisan nga kritikal nailhan lang sa ngalang Roger, nasikop usab ang kauban niining si Jason Abellana nga taga Oslob.

Ang habal-habal drayber nga si Marlon Curaton nga adunay pasaherong babaye giingong nagsunod sa taxi nga gimaneho sa biktima ug nakabantay nga gidunggab-dunggab ang drayber sa pasahero niini hangtud nga nabangga ang taksi sa paril.

Human niini daling nanggawas ang mga suspek apan naabtan sa ubang mga drayber sa habal-habal ug gitabangan sila og labay og bato hangtud nga naigo sa luyong bahin sa iyang ulo si Roger ug nahapla.

Human niini gitabangan sa pagkulata sa mga drayber ang suspek  ug naulang lang dihang nangabot na ang mga polis.

Si Abellana nasikop sa mga barangay tanod diha sa iyang giluklokang balay sa mao gihapong lugar.

Matud ni SPO1 Jeffrey Diola giingong nanakay ang duha ug pag-abot sa maong dapit didto na gitionan ang biktima og armas ug icepick apan misukol kini maong gidunggab sa makadaghang higayon.

Si Abellana mipadayag nga wala siya masayod kun asa sila dapita misakay tungod kay wala pa siya masuhito sa siyudad.

Daling gidala sa Cebu City Medical Center ang taxi driver human kini makaangkon og samad dinunggaban sa nagkadaiyang parti sa iyang lawas samtang si Roger kritikal ang kahimtang diha sa Vicente Sotto Memorial Medical Center.

Apan sa pakighinabi sa Banat News kang PO3 Eduard Escultor sa Theft and Robbery Section mikompirmar kini nga nakabsan gyud sa kinabuhi ang biktima pasado alas-3 kagahapon sa kaadlawon tungod usab sa nahiaguman niining trauma ug kagrabe sa mga samad dinunggaban. (/EIM) (BANAT NEWS)