Mayor sa Talisay mibahad

CEBU, Philippines - Ang mayor sa dakbayan sa Talisay nga si Johnny De los Reyes mibahad nga mopasaka og kaso batok sa masakpan nga nagpalusot og krudo sa mga sakyanan.

Ang maong bahad nunot kini sa isyu nga giingong ang garbage truck sa siyudad kuwangan ang balor P4,000 nga krudo o mokabat ngadto sa 100 ka litro nga itobil.

Matud sa mayor nga usa sa anomalosong ilang nabantayan karon mao nga dunay mga truck sa basura nga halos kuwangon sa usa ka adlaw ang P4,000 nga krudo nga itobil.

Gibutyag sa mayor nga dunay truck sa basura nga 80 ka litro ang kapasidad nga masulod nga krudo sa tangke dunay 90 ug 100 ka litro.

Ang mayor natahap nga dunay binuang nga nahitabo hinungdan nga ang tanang mga tanke sa garbage truck gipangbutangan na nila kini og silyo sugod kagahapon.

Ang mayor nagkanayon nga kung matangtang ang silyo buot pasabot nga dunay binuang nga gibuhat ang drayber sa truck.

Ang mayor mibahad nga dili siya magpanuko og pasaka og kaso batok sa drayber nga masakpang nagbuhat og binuang.

Ug kung ugaling mahutdan og krudo ang sakyanan samtang nagbiyahe ang drayber niini kinahanglang manawag gyud ngadto sa buhatan sa solid waste o sa motor pool aron apason sila dalhan og krudo.

Niadtong Miyerkules sa hapon ang mayor mipatawag og meeting tali sa mga drayber sa truck sa basura diin gituki nila ang maong problema.

Sa laing bahin, si Edwin Nierves, hepe sa Ecological Solid Waste Management Collection and Transport mibutyag sa Banat News nga niining ulahi lang nahitabo ang maong gidak-on sa konsumo sa krudo tungod kay sulod sa 24 oras ang ilang operasyon sa pagkolekta sa basura.

Apan matud ni Nierves nga dili makompirma kung ang P4,000 nga balor sa krudo nahurot ba gyud kini sa usa ka adlaw tungod kay base sa ilang pakisusi sa log book didto sa landfill sa barangay Tapul dunay drayber sa panggabii nga wala makapirma sa log book hinungdan nga maglisud sila og monitor niini.

Si Nierves nagkanayon nga nagpahigayon sila og imbestigasyon sa maong insidente.

Apan mipasabot kini nga kung ang usa ka drayber dili gani kini makamaong mo maneuver sa iyang sakyanan pasaka paingon ngadto sa bukid usa usab kini sa hinungdan nga modaku ang konsumo sa fuel. Ang Tapul usa kini sa mga bukirang barangay sa Talisay.

Matud usab ni Nierves nga ang compactor tungod sa mga mekanismo niini medyo daku usab kini og konsumo sa fuel.

Gibutyag usab ni Nierves nga dunay 12 ka mga drayber sa garbage truck lakip sa usa ka regular apan duha sa maong mga drayber wala niya tugoting modala og sakyanan tungod kay wala kini mga lisensiya. (BANAT NEWS)