4:00 PM habit batok dengue nagpadayon

CEBU, Philippines - Ang  pagsumpo sa  dengue,  programa  nga  padayong  gikampanya sa kagamhanan sa dakbayan sa Lapulapu pinaagi sa pagpanglimpiyo sa kabarangayan ug mga tulunghaang publiko niining panahon sa ting-ulan.

Ang  buhatan  sa panglawas  sa maong  dakbayan way  undang  sa pagpatuman  sa 4 o’clock habit o  pagpanghinlo  matag  hapon  sa  eskuylahan  ug  sa  mga  kabalayan.

Matag  alas 4:00  sa hapon  molihok  dayon  ang  mga  kabataan  sa pagpangyabo  sa  mga  tubig  sa uwan  nga  mapundo  sa  mga  lata  ug  uban  pang  kapundohan  og tubig  sulod sa tulunghaan.

Bisan  ang  mga  tagbalay  molihok  usab  inig-abot  sa alas 4:00  sa hapon  aron manilhig  ug  mangyabo  sa tubig  uwan  nga  mapundo  sa palibot  sa ilang  balay.

 Hinuon  ilang  sil-ingon  ang  mga  pundohanan  og  tubig  sama  sa balde, lata, goma,  planggana, flower vase,  ug   bisan sa mga kanal   nga  kapundohan  sa tubig.

Kining  mapundong  tubig   mahimong kapuy-an sa lamok nga magdala og sakit nga dengue.

Si Dr. Rodolfo  Berame nga maoy city health officer sa maong dakbayan maoy mangulo sa pagsuroy sa kabarangayan ug mga publikong tulunghaan.

Namutang  usab  siya  og   mga poster  nga  nagpahimangno   sa  mga  bata  ug  tiguwang  bahin  sa  paglikay sa sakit nga dengue. (BANAT NEWS)