Heavy equipment wa ipa-insured og tuyo

CEBU, Philippines - Ang mga opisyal sa dakbayan sa Sugbo miangkon nga gituyo nila nga wala ipa-insured ang ubang katigayonan sa siyudad sama sa mga dagkong makinarya ug building.

Si Cebu City Administrator Jose Marie Poblete miingon nga wala lang nila ipa-insured ang mga dagkong heavy equipment sama sa bulldozer, pison, payloader ug ang ubang building kay wala man kuno’y mangawat niining maong properties.

 Ang Commission on Audit (COA) miingon  nga   kalapasan sa balaud ang gihimo sa mga opisyal sa City Hall nga wala ipa-insured ang maong kahimanan.

 Matud ni Poblete nga  ang gisiguro nila sa pagpa-insured mao ang mga sakyanan sa City Hall kay aron mabayran kun kini makasugat og aksidente sa kadalanan.

Apan matud ni Poblete nga karong gibadlong sila sa COA ug miawhag nga ipa-insured g’yud ang tanang properties sa dakbayan sa Sugbo ila na kini nga pagahinan og budget para sa sunod tuig.

Matud ni Poblete nga nagtuo man gud sila nga wala g’yoy mangawat sa mga heavy equipment ilabi na nga anaa ra kini sa ilang stockyard kun walay trabaho.

Apan giangkon ni Poblete nga ang mga building angay nga ipa-insured g’yud aron mabayran kini kun mahitabo nga maigo kini sa sunog. (BANAT NEWS)