Labella nabalaka sa Buhisan Dam

CEBU, Philippines - Gipanguyawan si Acting Cebu City Mayor Edgardo Labella tungod sa pagsaka pag-ayo sa tubig sa Buhisan Dam kay basin  mahugno  kini ug  makamugna og dakung baha.

Ang ibabaw nga bahin sa Buhisan Dam usa ka sapa nga gikan sa kina-ibabwan ug ang inagos adto mopaingon sa dam.

Tungod sa kakusog sa uwan mosugwak ang tubig nga mosulod sa dam sa Metro Cebu Water District.

Gipadad-an na og suwat ni Labella si MCWD General Manager Armando Paredes ug giawhag nga monitoron  kanunay ang tubig sa MCWD dam aron dili kini makamugna og kakuyaw sa katawhan.

Matud ni Labella nga dihang gisusi nila ang MCWD dam ilang nakita nga misaka gayud pag-ayo ang tubig tungod sa subsob nga pag-uwan ug si Labella nabalaka kay basin og mahugno ang dam.

Ang mao nga dam nahimo kapin sa usa ka gatus ka tuig na ang milabay kay kabahin man kini kaniadto sa Osmeña Waterworks System. Si Labella miingon nga angay’ng mangandam daan ang MCWD pinaagi sa pag-iban kun ang tubig taas na kaayo kay adunay posibilidad nga dili na kini mapiog sa paril nga hinimo sa mga bato.

Ang kadagkoan sa City Hall makigtagbo sa mga opisyal sa Barangay Buhisan aron hisgutan kun unsaon nga malikayan ang posible nga katalagman. (/WC) (BANAT NEWS)