DPWH ug Cebu province ang gibasol sa pagkatanggong sa trapiko sa bridge

CEBU, Philippines - Gibasol sa Lapulapu City Traffic Management System o CTMS ang Department of Public Works and Highways 7 ug Cebu Province sa nahitabong kahuot sa trapiko sa Marcelo Fernan Bridge atol sa 2013 Cobra Ironman 70.3 Philippines Triathlon sa milabay’ng Domingo sa dakbayan sa Lapulapu.

Matud pa ni CTMS Chief Frank Brazil plantsado na ang tanang plano sa pagsulbad sa bagang duot sa trapiko atol sa maong kalihukan apan wala tumana sa DPWH ug sa Probinsiya sa Sugbu ang pagbuak sa usa ka isla sa maong taytayan.

Kini mao untay  agian  sa mga motorista hinungdan nga naghuot kini ug mimugna og bagang duot sa trapiko.

Atol sa gipahigayong ocular inspections sa milabay’ng semana ang DPWH 7 ug Cebu Province maoy gitahasan sa pagguba sa usa ka island habig sa dakbayan sa Lapulapu aron kaagian kini sa mga partisipante ug sa motorista.

Hinuon sa kinatibuk-an gihulagway ni Brazil nga malinawon ug walay aksidente sa kadalanan atol sa maong kalihukan gawas lamang sa mga ginagmay nga problema ang ilang nadawat may kalambigitan sa bagang duot sa mga natanggong.

Samtang si Lapulapu City Police Office Director  Sr. Supt. Rey Lyndon Lawas mipadayag sa iyang pasalamat sa mga sakop sa Philippine Air Force, Philippine Navy ug sa mga kadete ug sa tanang mga force multiplier sa malinawon nga pagpahigayon sa maong kalihukan diin walay mga dagkong hitabo o krimen nga dunay kalambigitan ang maong paugnat sa kusog.

 Si Mayor Paz Radaza sa iyang bahin mipadayag nga palambuon pa nila ang maong kalihukan sunod tuig diin ang Lapulapu pa gihapon ang magdumala sa maong kalihukan sa ikatulo nga higayon.

Matud pa ni Radaza kung unsay mga kakulangan karong tuiga sa maong kalihukan kinahanglan kining hatagan og igong pagtagad sunod tuig.( /EIM)  (BANAT NEWS)