PNoy mideklarar Agosto 9 holiday

CEBU, Philippines - Gideklarar ni Presidente Benigno “Noynoy” Aquino III ang Agosto 9 isip regular holiday sa tibuok nasud  alang  sa pagtimaan sa Eid’l Fitr sa mga Muslim.  Nahimutang kini sa gipagawas nga Proclamation No. 629 nga gipirmahan ni Presidente Aquino.

Tuyo niini  nga aron  kahatagan og higayon ang mga Muslim sa tibuok nasud nga makasaulog human sa usa ka buwan nga pagtimaan sa Ramadan.  Gawas sa Agosto 9, may duha pa ka  pista  opisyal sa buwan sa Agosto ang paaboton sa mga Pinoy sa tibuok nasud.

Ang Agosto 21 nga gideklarar na nga Special (Non-working) holiday isip Ninoy Aquino Day ug ang Agosto 26 nga usa ka regular holiday agi og pagsaulog sa National Heroes Day.

Ang maong mga holiday nakalatid sa Proclamation No. 459 nga gipirmahan niadtong Agosto 16, 2012 ni Presidente Aquino. (/WC) (BANAT NEWS)