Bay nahagsa tungod sa pag-ulan
CEBU, Philippines - Tungod sa way hunong nga pag-uwan niadtong Sabado hangtod na kagahapong adlawa usa ka abandonadong panimalay ang nahagsa ug diriyot maanod sa sapa tungod sa pagsaka sa tubig niini diha sa Sitio Tipoville sa barangay Guadalupe ning dakbayan.
Ang panimalay sa pamilyang Labra diin ang kasamtangang nagpuyo niini mao si Ronald John Labra. Apan giingong maayo na lang kay ang maong panimalay nasangit ngadto sa usa ka sementadong poste.
Si Kapitan Michael Gacasan ang kapitan sa Guadalupe mipadayag nga unta madali ang pag-implementar sa 3-meter easement zone sa mga balay nga anaa gitukod kilid sa sapa tungod sa peligrong nagpaabot sa mga molupyo panahon nga ting-uwan.
Sa pakighinabi sa Banat News ni City Risk Disaster Alvin Santillana mipadayag kini nga ila nang gitugyan sa mga barangay officials ang pag-atiman sa nahitabo sa Guadalupe apan dugay na silang mipahimangno nga kinahanglang mobakwit gilayon ang mga tagbalay kung mosaka na ang tubig sa sapa duol sa ilang pinuy-anan.
"Of course, dapat gyud na natong mapatuman ang easement zone kay naa man sila sa eminent danger. So, they need to be remove," pasabot pa ni Santillana.
Samtang sa bukirang bahin sa barangay Toong, dunay gi-report nga pagdahili sa yuta hinuon swerteng walay naapektahang mga residente sa insidente . (/EIM) (BANAT NEWS)
- Latest
