Duha ka mag-uuma gisulong gipamusil

CEBU, Philippines - Duha ka mga mag-uuma ang pulos anaa sa talandugong kahimtang human gipangsulong sa ilang mga kontra samtang nagpahuway sa ilang pinuy-anan sa managlahing lugar didto sa barangay Puente lungsod sa Carmen ug barangay Mantiha Uno siyudad sa Danao.

 Ang unang pagpamusil nahitabo sa Carmen diin ang biktima mao si Noven Maglasang Claren, 26, nagpuyo sa barangay Puente.

Matud ni PO2 Jerome Quimque sa Carmen Police Station dihang nahinabi sa Banat News, ang biktima nagpahuway sa iyang gipuy-ang payag dihang nanampit ang suspek ug sa iyang paggawas kalit siyang gipusil niini diha sa tiyan.

Ang biktima gidala sa  Danao City District Hospital samtang nisibat human sa hitabu ang suspek, ang kapolisan wala pa masayod kung unsay motibo sa suspek.

Pagkaalas 8:30 sa gabii laing pagpamusil usab ang nahitabo didto sa barangay Mantiha Uno sa Danao City diin  usa ka Elberato Landero, 34, ang napusilan sa wala mailhing tawo.

Matud ni SPO2 Ildefonso Prosia sa Danao City Police Station nga nakahinabi sa Banat News ang biktima paingon na untang matulog kauban ang iyang mga sakop sa pamilya apan dunay kalit lang nanuktok sa pultahan maong  nibakon kini ug gi-ablihan.

Apan diha-diha gipusil kini pag-abli sa pultahan ug naigo sa baba dayung sibat sa mamumuno , ang biktima gidala dayun didto gihapon sa Danao City District Hospital.

Ang kapulisan sa Danao ug Carmen padayon pang nag- imbestigar sa maong duha ka sunod sunod nga pagpamusil. EIM (BANAT NEWS)