Patayng lawas nabulit sa bala

CEBU, Philippines - Nabulit sa samad pinusilan ang  patay’ng lawas sa usa ka bayong-bayong nga napalgan  taliwa sa kamaisan sa bukirang bahin sa Sitio Upper Tigaotigao, barangay Cansuje, lungsod sa Argao niadtong Biyernes sa alas 4:00 sa hapon.

Ang biktima giila sa iyang mga kabanay nga si Rickjim Alberio, 17, ulitawo ug nagpuyo sa maong lugar.

Sa paghimo ning balita wala pa matumbok ang mga responsable sa krimin.

Si PO3 Benjamen Gerozaga sa Argao Police Station mibutyag  sa Banat News  nga ang biktima gikan sa siyudad sa Sugbo ug paingon na untang mopauli sa ilang balay.

Apan ang apohan niini nga wala makuha ang ngalan  maoy nakadiskobre sa biktima dihang miduaw  sa  iyang  uma.

Wala makatingog ang  apohan  dihang  nasud-ong  niini nga patay  na  ang iyang  apo  nga nagbuy-od   sa yuta  nga  napulos  samad  sa   mga  bala  ang  lawas.

Dali  kining  gi-report   ngadto  sa kapolisan ug  gituohan  sa mga  polis nga  gipusil ug gipatay sa  usa ngadto sa duha ka   tawo  ang  biktima.

Nagpabiling blangko pa ang kapolisan   bahin sa motibo sa krimin sanglit  ang mga kabanay   walay  giila  nga  kontra  ang  biktima.

Gumikan  niini  walay  nakitang  laing  hinungdan  ang   kapolisan  nga  malagmit  kapasanginlan  sa mipatay  sa biktima  ug  maoy  ilang  gisusi  sa pagkakaron. WC (BANAT NEWS)