Gibayran na ang tarokan og housing sa Mandaue
CEBU, Philippines - Gihatag na ang salapi isip pasiunang bayad sa Social Housing Finance Corporation (SHFC) sa palitong luna nga himoong socialized housing nga programa sa kagamhanan sa dakbayan sa Mandaue.
Si Maria Corina Montilla nga maoy senior account specialist sa SHFC, giabagan usab ni Joel Ejes sa pagtugyan sa kantidad nga P2.205 miyones ngadto kang Katthryn Yu ug Dindo Suico nga mga opisyal nga nagrepresentar sa tag-iya sa maong luna nga si Dr. Rogelio Gochoco, kinsa tua karon sa Amerika.
Ang katunga sa maong kantidad maoy pasiuna nga bayad sa 3,081 ka metro kuwadradong yuta nga gipanag-iya ni Gochoco.
Ang dugang katunga unya na ibayad kun mahingpit na ang pagbalhin sa ngalan sa kapunongan nga Marianville Homeowners Association Inc. ang titulo sa maong luna.
Ang maong pundok may mga sakop nga mikabat sa 49 ka pamilya nga maoy nagsilbing benepisyaryo niini.
Si Mayor Jonas Cortes maoy usa sa mitambong sa pagtunol sa maong kantidad isip usa sa mga saksi uban sa mga opisyal sa Community Mortgage Program (CMP),
Mitambong usab ang mga opisyal sa Urban Development Office (HUDO) sa kagamhanan nga maoy mobilize ug facilitator.
Si Tony Pet Juanico nga maoy pangulo sa HUDO miingon nga ang 33 ka CMP projects sa kagamhanan sa maong dakbayan maoy mapahimuslan sa 2,618 ka pamilya sa higayon nga mahingpit na ang pagbayad niini. (/WC) (BANAT NEWS)
- Latest
