Nanglili sa naligo giluba sa bana

CEBU, Philippines - Samaran  sa tiyan  ang usa ka  lalaki  human  kini  dunggaba sa  bana  sa giingong  gilili  niya  samtang  naligo ang  kapuyo  niini  sa banyo  sa ilang  balay  sa  barangay  Mactan, dakbayan  sa Lapulapu  sa  miaging  hapon.

Si PO2 Jomar Tolentino sa homicide section sa kapolisan sa maong dakbayan miila sa biktima nga si  Ariel  Rondina, 25, ug ang suspetsado mao si Benjamin Abais, 26 ug pulos nagpuyo sa maong dapit.

Matud  ni PO2 Tolentino nga niadtong milabay’ng adlaw  sa  wala pa mahitabo ang pagpanunggab  gisukmatan  sa  suspetsado  ang biktima   nganong  gilili  niini  ang  iyang  kapuyo  nga naligo  sa banyo.

Dugang pa niya nga nagpangusmo  sa kasuko  ang suspek  ug dihang nagkasugat  sila  nga naglakaw  kalit lang   mibabag  ang  suspetsado sa dalan, dayong dunggab   niini sa tiyan sa biktima

Samaran  sa tiyan  ang  biktima  nga  gibiyaan  sa suspek .

Gihatud  sa tagtungod  ang  biktima  ngadto   sa Lapulapu City Hospital apan  gibalhin  usab  dayon  kini  ngadto  sa Vicente Sotto Memorial Medical Center sa dakbayan sa Sugbo.

Padayon  pa nga  gipangita  sa kapolisan  ang  suspetsado  aron paatubangon  kini  sa kiha  nga  giandam  sa  biktima  batok  kaniya. (/WC) (BANAT NEWS)