Kapuyo way gana mokiha sa mipatay sa iyang bana

CEBU, Philippines - Dili interesado nga mopasaka  og  kiha  ang kapuyo ingon man kabanay sa 25 anyos nga gitabangan og bunal ug  namatay sa iyang  amahan  ug igsoon  didto  sa barangay Ablayan ,lungsod sa Dalaguete niadtong Sabado sa alas 6:00 sa gabii.

Si SPO3 Gelson Solibio sa Dalaguete Police Station mibutyag sa  Banat News nga hangtud kagahapon wala gyud mopatim-aw sa ilang buhatan ang kapuyo niini aron pagpasaka og kaso  batok sa suspek nga iya ra usab nga ugangan nga si Rufino Gesim ug anak  nga si Raul Gesim, 25.

Matud ni SPO3 Solibio nga bisan ang mga iyaan sa biktima nga ilang silingan dili usab interesado nga mopasaka og kaso.

Kini  tungod kay gihulagway nila  nga badlongon ug dili gani makasaka sa iyang mga paryente tungod sa pagka- abusado ilabi na kun mahubog.

Matud ni SPO3 Solibio  nga gipaabot na lang nila  ang reglamentary period  ugma, Miyerkules sa pagkapupos sa 36   oras ug ila   na  nga buhi-an ang duha ka mga suspek nga natanggong karon sa karsel human boluntaryong nitahan sa ilang kaugalingon pagka -human sa hitabo.

Matud  ni SPO3 Solibio  nga nakasabot ang kapuyo  nga ang iyang bana maoy sad-an sa hitabo tungod kay una kining nanunggab.

Kini dihang   nasuko nga gibadlong sa pagpanghagis niini sa iyang asawa ug anak kay nahubog,  hinungdan  nga  ang suspek nga si Rufino nakahigayon  pagkuha og tubo  ug gibunal- bunalan kini sa ulo hangtud namatay. WC (BANAT NEWS)