Gun runner na-buybust sa kapolisan
CEBU, Philippines - Nagtingkagol sa karsel ang usa ka gipasanginlang gun runner human kini masikop sa buybust operation tali sa kapolisan sa Regional Special Operations Group diha sa dalan Logarta sa North Reclamation Area ning dakbayan sa Sugbu.
Ang nasikop mao si Joel Pasaol alyas Bebot, 43, molupyo sa Looc dakbayan sa Danao.
Ang RSOG-7 nakadawat og taho nga si Pasaol namaligya kini og armas sa ilang dapit ug dihang ilang gipailawom sa surveillance nakompirmar nila ang maong report hinungdan sa gihimong buybust operation.
Matud pa nga mi-order ang poseur buyer og balor P30 mil nga mga armas nga gilangkoban sa duha ka KG9 submachine pistols ug mga magazines niini, usa ka kalibre .45 nga adunay mga magazines.
Dihang gidawat ni Pasaol ang kwarta giposasan kini dayon sa kapolisan ug gipahibaw sa kalapasan nga iyang nahimo.
Si Pasaol nga gikuhaan sa iyang habig wala kini mitingog ug igo lang kini nga naglingo-lingo dihang gipangutana sa mga sakop sa media.
Ang deputy chief for operation sa RSOG, Insp. Romeo Sentinta mipadayag hingusgan nila karon ang operasyon batok sa loose firearms nunot sa nagsingabot nga synchronized Sangguniang Kabataan ug Barangay Elections. EIM (BANAT NEWS)
- Latest
