Kaalyado ni Garcia nahatagan og permit mangubkob og balas

CEBU, Philippines - Nakaluwat pa og permit si kanhi Gob. Gwendolyn Garcia alang sa negosyo sa iyang kaalyado nga si Asturias Mayor Alan Adlawan sa naghinapos na nga mga adlaw sa iyang termino sa Kapitolyo human sa iyang pagkasuspenso.

Ang SAG Industrial Permit No. 2013-09 nga gipetsahan og Hunyo 21, 2013 giluwatan ni Garcia ngadto ni Adlawan sa Balamban Construction Ltd. Co.

Ang permit nagtugot sa pagpangubkob og usa ka libo ka metro kubiko nga bas ug graba sa barangay Biasong, Balamban ug Ubogon, Asturias nga may gilapdon nga 35,816 metro kwadrado.

Ang permit balido kini hangtud sa lima ka tuig gikan sa pag-isyu niini. Kantidad nga P75 mil ang gibayad ni Adlawan sa paglukat sa maong permit sa buhatan sa Provincial Treasurer niadtong Enero 16, 2013 samtang suspendido pa si Garcia.

Ang maong kantidad gibase sa tag P75 matag metro kubiko nga gimando sa ordinansa sa lalawigan sa Sugbo.

May cash bond na usab si Adlawan sa kantidad nga P20 mil nga iyang gibayad niadto pang Disyembre 17, 1997.

Hinoon ang maong permit mahimo pang kanselahon sa gobernador kung mapakyas si Adlawan sa pagtuman sa nalatid niini nga kondisyon.

Kinahanglang moduso og binuwan nga production report si Adlawan sa Kapitolyo diin malatid ang gidaghanon sa materyales nga nahakot, buhis nga gibayran, presyo sa pagbaligya ug uban pa.

Ang maong permit ginotaryohan ni Atty. Dario Rama Jr. niadtong Hunyo 24, 2013. (BANAT NEWS)